呢篇野寫咗幾日，諗過依家係咪適合嘅時間post。知道香港成個六月都充滿着動盪嘅氣氛。身為醫護人員，睇見市民私隱冇保障，膠層令到醫護同警察對立，警崗可以隨時執笠，光看新聞已經身心疲累。
希望每次睇呢個blog，都能夠比大家送一鬆口氣，忘記呢個混亂社會一陣。當係Escape from reality，充一充電，再繼續自己嘅信念。
記住要小心，一個都不能少。
PS：其實警崗關門大吉，唔係醫院嘅入面，你就要出去附近巡邏日曬雨淋。又唔去得遠喎，每個鐘頭要返嚟報道。坐係醫院入面他他條條唔好咩？其實佢哋啲高層見你小學雞咁投訴（Yeeeeeee，佢唔俾張凳我坐呀！），係咪玩緊你，俾人懲罰緊呀？
～～～
Any肥，我哋趁住孖B而家唔知發生緊咩事，衝左去快閃四日三夜築地拋子棄女之旅。橫掂次次都去築地食嘢，今次索性住埋喺入邊，方便可以返酒店泵奶。
最多人問嘅就係你捨得啲仔女咩？有冇掛住佢哋？（下一句最多人問就係你食得魚生咩？哈哈！）
唔掛住就呃你嘅！我哋每日都有開細路電視睇吓屋企嘅情況。不過最掛住隻狗，因為佢夜晚會唔瞓等我哋返嚟。但係仔女而家又唔會知道我地走，又冇掛住我地，返嚟又冇特別開心。所以如果唔而家去旅行，第時想二人世界都幾難。
重點係我個工人姐姐終於嚟咗⋯⋯幾日。佢之前有湊過兩個BB。見佢抱BB/換片/幫BB換衫等嘅手勢都OK。同埋我好奢侈地呀陪月仲喺度，加埋奶奶喺度住幾日，所以我哋就好放心肆無忌憚咁去旅行。
去到就係食魚生，泵奶，食魚生，泵奶⋯⋯哈哈哈！豐州都有去，不過同我Expect嘅一樣，只不過係將一啲出名嘅食肆搬入去一個好大好新淨嘅地方。去豐州都好煩，由地鐵行出嚟行到死先至入到去食嘢。我都係覺得築地場外市場比較好玩。
全程嘅亮點係迷你豬Cafe。早一個月已經要book。姑娘1聽到已經問入面會唔會有臭味。已經幻想得到佢皺眉頭， in disbelief 咁覺得我哋係傻嘅，豬都好玩！人夫最大嘅心願其實係養豬⋯⋯香港地要實現呢個夢想比較困難，唯有帶佢黎攬下抱下就算。玩完嘅感受係，平靚正！親子旅遊必備嘅一個項目！
Search